Tacaíocht do theaghlaigh díláithrithe sa tSiria

Meastar go bhfuil 2,000,000 duine díláithrithe go hinmheánach sa tSiria. Tá Cúnamh Éireann ag freagairt don éigeandáil seo.

Dhá mhí ó shin theith Abdullah, siúinéir as an tSiria, a bhaile i Aleppo chun éalú ón gcoimhlint. Maraíodh cuid mhór den teaghlach agus nuair a scriosadh gnó siúinéireachta agus teach Abdullah le hionsaí buama ón aer chinn an teaghlach go raibh sé in am tearmann a lorg in áit eile.

“Ní fhéadfadh muid fanacht i Aleppo dada ní b’fhaide, toisc go raibh mé gan teach gan obair, agus bhí sé ró-chontúirteach a bheith ann ar aon nós, mar gheall ar an troid”, a mhínigh Abdullah.

“Ní fhéadfadh muid fanacht i Aleppo dada ní b’fhaide, toisc go raibh mé gan teach gan obair, agus bhí sé ró-chontúirteach a bheith ann ar aon nós, mar gheall ar an troid”.

In éineacht lena bhean chéile Fatima, a dtriúr clainne beaga agus an mórtheaghlach, d'iarr sé tearmann i sráidbhaile beag in aice le Corconia i dtuaisceart na Siria.

Cé go raibh sé deacair ag an teaghlach seo a mbaile a fhágáil, ina dhiaidh sin féin braitheann siad níos sábháilte san áit ina bhfuil siad. “Anseo sa sráidbhaile seo, níl dada againn ach an oiread, ach amháin an méid beag a thugann an coiste faoisimh  dúinn, ach ar a laghad táimid slán”

Tá Goal, le tacaíocht ó Chúnamh Éireann, ag cabhrú le Siriaigh cosúil le Abdullah agus a theaghlach a raibh orthu a dtithe  fhágáil  chun éalú ón gcoimhlint. Faigheann teaghlaigh pluideanna agus trealaimh sláinteachais a sholáthraíonn Cúnamh Éireann agus plúr a sholáthraíonn Goal.  Tá 33,000 pacáiste bronnta ag Cúnamh Éireann agus 1,764 dáilte go dtí seo ag Goal rud a chuidíonn le níos mó ná 10,000 duine.  

Meastar go bhfuil 2 mhilliún duine díláithrithe go hinmheánach sa tSiria. Faigheann a bhformhór dídean mar is féidir leo, go minic i bhfoirgnimh gan leictreachas, gan teas, gan uisce reatha. Sin dúshlán ag am ar bith den bhliain ach baineann deacracht áirithe leis le linn gheimhreadh fuar na Siria.